25
Feb

Стретнуце фахового тиму Совиту Европи зоз директорами меншинских Заводох

Фахови тим котри роби на документу културней политики Сербиї, у котрим водзаци експерти з обласци културней политики Кетрин Меркел зоз СЕ и водзаци европски експерти з обласци културней политики Филип Керн зоз Францускей, Кимо Улаке зоз Финскей и Ларс Сиберґ зоз Данскей  нащивя Нови Сад и Покраїнски секретарият за културу и явне информованє.

 

На штварток 26. фебруара 2015. року у будинку Покраїнскей влади, у сали 23 на прешим поверху, у чаше од 14.50 – 15.50 годзин отрима ше схадзка фахового тиму Совиту Европи и Министерства култури и информованя Републики Сербиї зоз директорами Заводох за културу националних меншинох у АП Войводини и представителями Покраїнкого секретарияту за културу и явне информованє.

 

Циль схадзки виробок звиту котри ше придава до Совиту Европи як и потримовка редефинованю будуцих напрямох културного розвою и културних политикох державох членох Совиту Европи.

 

05
Feb

Делеґация Пряшовского самоуправного краю (Словацка Република) у нащиви АП Войводини

3. фебруар 

2-APV-01После подписаного Спорозуменя о медзиреґионалним сотруднїцстве медзи Пряшовским самоуправним крайом (Словацка Република) та АП Войводину (од 26. новембра 2014. року), делеґация Пряшовского самуправного краю хтору очольовал потпредсидатель др Радослав Чуха, а у хторей  були и Петер Сокол ( посланїк и началнїк Округу Стара Любовня) , Марґарета Ґайдошова (задлужена за медзинародне сотруднїцство у Уряду  ПСК) и  инж. Мирослав Буйда (посланїк у Скупштини ПСК и началнїк Бардейовского  краю), урядово нащивела АП Войводину. Спред Скупштини АП Войводини домашнї им були подпредсидателє Ана Томанова Маканова  и Тихомир Вребалов, як и покраїнски посланїк и предсидатель Националного  совиту Руснацох   Славко Рац.

 

Подпредсидателька Скупштини Войводини и предсидателька Националного совиту Словацох як и предсидатель роботней ґрупи спред АП Войводини Ана Томанова Маканова медзи иншим гварела же сотруднїцтво реалне у обласцох за хтори Спорозуменє подписане, а терашнї сход крочай далєй у институционализованю його витворйованя.

 

Предсидатель Националного совиту Руснацох и покраїнски посланїк Славко Рац  з тей нагоди надпомнул же инциятор подписованя того Спорозуменя бул Йоаким Грубеня, же би ше давно розпочате сотруднїцтво през институализованє дзвигло на висши уровень. Сотруднїцтво з краянами у Словацкей и дотераз було удатне, а з подписаним Спорозуменьом будзе преширене и на други обласци и подзвигнуте на висши и квалитетнєйши уровень.

 

Радослав Чуха, потпредсидатель Пряшовского самовправного краю  хтори меновани спред словацкого  боку буц и предсидатель роботней ґрупи,  наглашел же подписане Спорозуменє отвера можлївосци сотруднїцтва двох крайох прейґ числених проектох, а медзи найзначнєйшима проєкт Европскей униї хтори ше одноши на образованє – „Програма 7”. Сотруднїцтво можлїве и през лоґистичну и фахову помоц менаджерох, а конкретнєйши приклади сотруднїцтва прейґ Спорозуменя мож очековац у другей половки того рока. Пан Чуха поволал представнїкох зоз АП Войводини официйно вжац учасц на предстояцим медзинародним Бизнис форуме у Кошицох ( май мешац) дзе би ше указала нагода презентовац тоти можлївосци и привредни капацитети хтори АП Войводина наисце ма а цикави су за можлївих потенцийних европских инвеститорох…

 

Делеґация Пряшовского самоуправного краю у Скупштини Войводини мала и роботне стретнуце з представителями националних совитох Руснацох и Словацох у Сербиї, директорами Заводох за културу войводянских Руснацох и Словацох, як и представителями Одсекох за русинистику и словистику  на новосадским Филозофским факултету.

 

Директор Заводу за културу войводянских Руснацох мр Серґей Тамаш визначел дзепоєдни конкретни програми у обласци култури хтори уж того року буду витворени дзекуюци Спорозуменю / порушани питаня о конкретних крочайох универзитетского сотруднїцства и виглєдовацких центрох (черанка школярох, студентох, професорох и наукових виглєдовачох), а окремна повага придата обласцом привреди, ЕУ проєктох,   сучасней култури и мултикултуралней уметносци як и информаованю: перши конкретни крочай будзе госцованє танєчного ансамблу «ПУЛЬС» на фестивалу «Червеней ружи» того 2015. року, а заплановани тиж и фахово роботнї за наших хореоґрафох; театралне сотруднїцство ( госцованє Театра Олександра Духвновича на тогорочним фестивалє  «Петро Ризнич Дядя»); сотруднїцство Заводу за културу войводянских Руснацох и Музею русинскей култури зоз Пряшова та инше.

 

Др Янко Рамач визначел же Филозофски факултет подписнїк догварки проєкту Европскей униї „Еразмус Плус”, прейґ хторого ше планує  сотруднїцтво медзи науковима институциями, дзе предвидзена черанка студентох и наставного кадру помедзи нашу Катедру за руски язик и Институтом за українистику и  централноевропски студиї у Пряшове (заинтересовани  за сотруднїцство).

 

Тиж так, госци зоз Словацкей мали нагоди участвовац и роботно розменїц искуства и з членми Одбору за европски интеґрациї и медзиреґионалне сотруднїцтво Скупштини АП Войводини.

 

Кед же у питаню проєкти ЕУ,  постої реална можлївосц уключиц ше до тройного сотруднїцства,  дзе треба вибрац ещи єдну трецу сушедну жем хтора полноправни член ЕУ (окрем  Словацкей) и ясно дефиновац  и добре виплановац заєднїцки проєктни предклади на хтори зме ше годни уключиц як копартнере (актуални теми у Европи Дунайска стратеґия и  обласц образованя «Програм 7» як  и змоцньованє капацитетох и людских ресурсох медзи националнима меншинами ).

 

У роботних схадзкох перши дзень учасц вжали Славко Рац, предсидатель Националного совиту, мр Среґей Тамаш, директор ЗКВР, др Янко Рмаач, Одсек за русинистику Филозофского факултету, Йоаким Грубеня, член Вивершного одбору Союзу Руснацох українцох РС и член Одбору за службове хаснованє язика и писма при Националному совиту, Мелания Римар, предсидателька Одбору за образованє, Иван Сабадош, предсидатель Одбору за информованє при Националному совиту.

 

4. фебруар

 

1-RK-01У рамикох роботней нащиви делеґациї Пряшовского самоуправного краю АП Войводини, други дзень госци зоз Словацкей нащивели Руски Керестур, а пред тим були у Бачким Петровцу ( нащива Оштини, Ґимназиї «Ян Колар» та Здруженя петровацких женох ).

 

У Руским Керестуре делеґация зоз Словацкей и їх домашню, подпредсидательку Скупштини Войводини Ану Томанову Маканову, нащивели Основну и штредню школу з домом школярох „Петро Кузмяк”, дзе их привитала членїца Националного совиту Руснацох (НС) и о.д. директора Школи Хелена Пашо Павлович зоз сотруднїками, а потим Дом култури и Руски народни театер „Петро Ризнич Дядя”.

 

Попри спомнутей Пашо Павловичовей, у Руским Керестуре им домашнї були предсидатель НС Руснацох и покраїнски посланїк Славко Рац, подпредсидатель НС Микола Шанта, предсидатель Вивершного одбору НС Желько Ковач, директор Дому култури Яким Рац и директорка РНТ Ивана Дудаш, а з госцами у Керестуре були и директор Заводу за културу войводянских Руснацох Серґей Тамаш и член Одбору за службене хаснованє язика и писма НС Яким Грубеня.

 

Хелена Пашо Павлович госцох поблїжей упознала з керестурску Школу, наглашуюци же є и єдина ґимназия по руски нє лєм у Сербиї, алє и швеце, а познєйше бешедоване и о дзепоєдних можлївосцох за сотруднїцтво у образованю. Госци поопатрали ушорени интернат и дзепоєдни учальнї, а у єдальнї Школи домашнї им пририхтали стародавни руски єдла – капущанїки, белюши, поаґачики, кашу.

 

У Доме култури делеґацию з ПСК и АП Войводини з рускима народнима шпиванками насампредз привитала Мишана шпивацка ґрупа, под руковительством Юлияна Рамача Чаму, а потим директор Яким Рац представел установу як єдну з трох професийних у обласци култури, як и нашо найвекши манифестациї и фестивали. О РНТ „Петро Ризнич Дядя”, алє и Туристичним здруженю Руски Керестур, хторому є тиж на чолє, бешедовала Ивана Дудаш.

 

У розгваркох заключене же Спорозуменє о сотруднїцтве того року будзе витворене насампредз у обласци култури, прейґ нащивох пряшовского ансамблу ПУЛС и Театру Александра Духновича, одредзених фаховцох у обласци култури, културного туризму,  алє и у образованю, прейґ черанкох нащивох штредньошколцох и студентох ( през лєто заплановане / юл и август орґанизованє Лєтнєй школи у природи у Татрох дзе нашо школяре поволани вжац учасц) . Надалєй плановане витворйованє и заєднїцких програмох у рамикох Дунайскей стратеґиї и других проєктох з хторима ше будзе конкуровац за средства з ЕУ.

22
Jan

Отримана шеста електронска схадзка Управного одбору Заводу

Вчера, 21. януара отримана шеста електронска схадзка Управного одбору Заводу за културу войводянских Руснацох, на котрей були два точку Дньового шору:  прилапйованє  Плану и програми роботи и  Финансийного плану за 2015. рок.

Управни одбор у децембру уж начално розпатрал и дефиновал План активносцох и Финансийни план за 2015. рок, а у медзи чаше кориґовани и дефиновани напрямки роботи и средства за тот чечуци 2015. рок.

Члени УО Заводу єдногласно потримали таку позарядову електронску схадзку и єдногласно прилапени План и програм роботи и Финансийни план Заводу за 2015. рок.

Заєднїцка координацийя членох УО и Директора Заводу муши швидко и конструктивно одреаґовац же би ше затримало порядне функционованє Заводу, та праве прето зме були примушени робиц на тот способ,

Буджет за тот рок виноши 6.600.000,00 динари, од чого програмски трошки 3.450.000,00, трошки Заводу 3.390.280.00, а заплановани наменски средстава виноша 944.00,00. Дзепоєдни програмски актвносци Завода то преклади и видаванє кнїжкох и моноґрафийох, публикованє каталоґох и орґанизованє вистави «Шицко то оглашки и реклама», троязична моноґрафия и ДВД виданє «Облєчиво, ношнї, танци бачванско-сримских Руснацох», вецейрочни виглєдовацки проєкт историї Руснацох у Войводини, музичне ЦД видянє «Ruthen World», Фахова помоц нашим КУД-ом и др.

Тото цо забера увагу, у наяви отримованє заєднїцких роботних схадзкох и консултацийох Националного совиту Руснацох, Заводу за културу войводянских Руснацох и Руского слова, коло дальшєй координациї и можлївосцох пренаходзеня  нових заєднїцких конструктивних способох ришованя двох найзначнєйших и найвекших проєктних активносцох у буджету Завода, хтори вшелїяк треба и у будучносци потримац, змоцнїц и далєй афирмовац.

20
Jan

Централна преслава Националного швета Руснацох у Вербаше

Централна преслава Националного швета Руснацох у ВербашеНа сам дзень швета, всоботу, 17. януара, у Вербаше орґанизована Централна преслава Националного швета Руснацох у Сербиї. У рамикох програми  отримане змаганє у столним тенису Спортских бавискох „Яша Баков”, бул поставени етно-стол зоз стародавнима єдлами, отворени два вистави подобових роботох уметнїкох з Вербасу, представена моноґрафия „Руснаци у Вербаше”, служена Благодарна Архиєрейска Служба Божа, отримана Шветочна академия, а програма, хтора була на вецей местох, закончена зоз заєднїцким коктелом за госцох, учашнїкох и домашнїх.

Шицки програми, окреме вечарши, були барз добре нащивени и присуствовали на нїх Руснаци зоз скоро шицких местох у Сербиї, Руснаци з Горватскей, Русини зоз Словацкей, представителє амбасадох Словацкей и України у Беоґрадзе, госци з України, представителє державних и покраїнских орґанох, локалних самоуправох дзе жию Руснаци, представителє других националних заєднїцох, члени Националного совиту Руснацох и його подручних канцеларийох, священїки нашого Апостолского еґзархату, та руководителє и представителє наших найзначнєйших установох, институцийох и здруженьох.

Централна преслава Националного швета Руснацох у Вербаше1Централна програма – Шветочна академия з нагоди Националного швета Руснацох у Сербиї отримана на 20 г. у кино-сали „Югославия”, хтора була мала прияц шицких нащивительох, та програму провадзели и на векшим ТВ у голу Биоскопу. Як то уж узвичаєне, понеже то була осма Централна преслава Националного швета, Академия почала з гимну Сербиї „Боже правде” и шветочну шпиванку Руснацох у Сербиї „Браца Русини”, хтори одшпивал Хор домашнього КПД „Карпати” з провадзеньом Националного оркестру Руснацох, под дириґенством Мирона Сивча.

После привитних словох и винчованкох визначних госцох и домашнїх, КПД „Карпати” ше представело и зоз своїм блоком, так же народну шпиванку „Зашвиц мили мешачку” одшпивала Жридлова ґрупа, солистки Гелена Папуґа композицию „Моя ровнїна”, а Дияна Мученски „Ей, сущела лїщина”, же би на концу того блоку наступел и познати вербаски длугорочни шпивацки дует Славка и Михал Тамашово, зоз шпиванку „Стриберни роки”. Шицких шпивачох з Вербасу провадзел оркестер „Карпатох”.

На академиї участвовали и рецитаторе з Вербасу – Юлиян и Петро Медєшово, та Тихомир Гирйоватий, котри вєдно гутерели писню Юлияна Тамаша „Гирми, птици шпиваю”, а Александра Лендєр гуторела познату писню Михала Рамача „Чукундїдов ошмих”.

А-капела и з провадзеньом Националного оркестру Руснацох наступели Дзивоцка шпивацка ґрупа КУД „Тарас Шевченко” з Дюрдьова, а як солисти нашо младши, алє уж афирмовани шпиваче з композициями руских авторох – Наташа Варґа (Цирба) зоз шпиванку „Валцер младосци”, Борис Маґоч зоз шпиванку „Перша любов”, Ана Римар зоз шпиванку „Даруй ше”, Танита Ходак зоз шпиванку „Знова ме поглєдай”, Лїляна Барна Никитович зоз шпиванку „Цмонєбово очи”, та дует Мирела Тимко и Саня Полдруги, зоз шпиванку „Розмария и лелия”.

Попри венчику руских шпиванкох з назву „Руски мелодиї”, Национални оркестер ше того року представел и з Потпурийом Моцарта и „Ромео и Юлию” Ротеа, а у аранжманох руководителя Оркестру и дириґента Мирона Сивча.

Шветочна академия на Централней преслави Националного швета Руснацох у Вербаше закончена з родолюбиву шпиванку Дюру Латяка и Агнети Тимко „З давен давна”, хтору одшпивал Хор КПД „Карпати” з провадзеньом Националного оркестру, а солиста бул Янко Сеґеди.

Конферансу, автора Александра Мудрия, у хторей поблїжей були представени Руснаци у Вербаше, як и КПД „Карпати”, хторе означує 25-рочнїцу роботи, водзели Марина Сабадош и Златко Рамач.

Шицки манифестациї Централней преслави у Вербаше орґанизовали, пририхтали  и помогли Завод за културу войводянских Руснацох, Општина Вербас, КПД „Карпати” и вербаска Подручна канцелария Националного совиту Руснацох.

Централна преслава Националного швета Руснацох у Сербиї нарок будзе отримана у Кули.

 

20
Jan

Госци на преслави и Шветочней академиї

Госци на преслави и Шветочней академиїНа Шветочней академиї на Централней преслави Националного швета Руснацох у Сербиї, всоботу, 17. януара у Вербаше, швето повинчовали заменїк предсидателя Општини Вербас Милан Ґлушац, ґенерални секретар предсидателя Републики Сербиї Неделько Теньович, подпредсидатель Народней скупштини Републики Сербиї Иґор Бечич, амбасадор Словацкей у Београдзе Ян Вашо, одправнїк роботох Амбасади України у Беоґрадзе Євґения Филипенко, подпредсидателька Скупштини Войводини Ана Томанова Маканова, предсидатель Националного совиту Руснацох Славко Рац и апостолски еґзарх за грекокатолїкох у Сербиї кир Георгий Джуджар.

Госци на преслави и Шветочней академиї1На Централней шветочносци у Вербаше присуствовали и народни посланїци Олена Папуґа, Марияна Мараш з Вербасу, котра и предсидателька Скупштини општини Вербас и Лїляна Бероня з Кули, як и предсидателька Скупштини општини Кула Снежана Мркаич.

Окреме привитани и делеґация Свиднїку зоз Словацкей, на чолє з городоначалнїком Яном Голодняком, делеґация Руснацох зоз Словацкей, у хторей були Звонко Костелник, Агнетка Балатинац, Дубравка Рашлянин и Борис Бучко, тиж и директор Заводу за културу войводянских Руснацох мр Серґей Тамаш, директорка НВУ „Руске слово” Мартица Тамаш, та редакторе – Борис Варґа „Руского слова”, Златица Няради рускей програми Радио Нового Саду и Мирко Канюх рускей редакциї ТВ Войводини.