05
Feb

Делеґация Пряшовского самоуправного краю (Словацка Република) у нащиви АП Войводини

3. фебруар 

2-APV-01После подписаного Спорозуменя о медзиреґионалним сотруднїцстве медзи Пряшовским самоуправним крайом (Словацка Република) та АП Войводину (од 26. новембра 2014. року), делеґация Пряшовского самуправного краю хтору очольовал потпредсидатель др Радослав Чуха, а у хторей  були и Петер Сокол ( посланїк и началнїк Округу Стара Любовня) , Марґарета Ґайдошова (задлужена за медзинародне сотруднїцство у Уряду  ПСК) и  инж. Мирослав Буйда (посланїк у Скупштини ПСК и началнїк Бардейовского  краю), урядово нащивела АП Войводину. Спред Скупштини АП Войводини домашнї им були подпредсидателє Ана Томанова Маканова  и Тихомир Вребалов, як и покраїнски посланїк и предсидатель Националного  совиту Руснацох   Славко Рац.

 

Подпредсидателька Скупштини Войводини и предсидателька Националного совиту Словацох як и предсидатель роботней ґрупи спред АП Войводини Ана Томанова Маканова медзи иншим гварела же сотруднїцтво реалне у обласцох за хтори Спорозуменє подписане, а терашнї сход крочай далєй у институционализованю його витворйованя.

 

Предсидатель Националного совиту Руснацох и покраїнски посланїк Славко Рац  з тей нагоди надпомнул же инциятор подписованя того Спорозуменя бул Йоаким Грубеня, же би ше давно розпочате сотруднїцтво през институализованє дзвигло на висши уровень. Сотруднїцтво з краянами у Словацкей и дотераз було удатне, а з подписаним Спорозуменьом будзе преширене и на други обласци и подзвигнуте на висши и квалитетнєйши уровень.

 

Радослав Чуха, потпредсидатель Пряшовского самовправного краю  хтори меновани спред словацкого  боку буц и предсидатель роботней ґрупи,  наглашел же подписане Спорозуменє отвера можлївосци сотруднїцтва двох крайох прейґ числених проектох, а медзи найзначнєйшима проєкт Европскей униї хтори ше одноши на образованє – „Програма 7”. Сотруднїцтво можлїве и през лоґистичну и фахову помоц менаджерох, а конкретнєйши приклади сотруднїцтва прейґ Спорозуменя мож очековац у другей половки того рока. Пан Чуха поволал представнїкох зоз АП Войводини официйно вжац учасц на предстояцим медзинародним Бизнис форуме у Кошицох ( май мешац) дзе би ше указала нагода презентовац тоти можлївосци и привредни капацитети хтори АП Войводина наисце ма а цикави су за можлївих потенцийних европских инвеститорох…

 

Делеґация Пряшовского самоуправного краю у Скупштини Войводини мала и роботне стретнуце з представителями националних совитох Руснацох и Словацох у Сербиї, директорами Заводох за културу войводянских Руснацох и Словацох, як и представителями Одсекох за русинистику и словистику  на новосадским Филозофским факултету.

 

Директор Заводу за културу войводянских Руснацох мр Серґей Тамаш визначел дзепоєдни конкретни програми у обласци култури хтори уж того року буду витворени дзекуюци Спорозуменю / порушани питаня о конкретних крочайох универзитетского сотруднїцства и виглєдовацких центрох (черанка школярох, студентох, професорох и наукових виглєдовачох), а окремна повага придата обласцом привреди, ЕУ проєктох,   сучасней култури и мултикултуралней уметносци як и информаованю: перши конкретни крочай будзе госцованє танєчного ансамблу «ПУЛЬС» на фестивалу «Червеней ружи» того 2015. року, а заплановани тиж и фахово роботнї за наших хореоґрафох; театралне сотруднїцство ( госцованє Театра Олександра Духвновича на тогорочним фестивалє  «Петро Ризнич Дядя»); сотруднїцство Заводу за културу войводянских Руснацох и Музею русинскей култури зоз Пряшова та инше.

 

Др Янко Рамач визначел же Филозофски факултет подписнїк догварки проєкту Европскей униї „Еразмус Плус”, прейґ хторого ше планує  сотруднїцтво медзи науковима институциями, дзе предвидзена черанка студентох и наставного кадру помедзи нашу Катедру за руски язик и Институтом за українистику и  централноевропски студиї у Пряшове (заинтересовани  за сотруднїцство).

 

Тиж так, госци зоз Словацкей мали нагоди участвовац и роботно розменїц искуства и з членми Одбору за европски интеґрациї и медзиреґионалне сотруднїцтво Скупштини АП Войводини.

 

Кед же у питаню проєкти ЕУ,  постої реална можлївосц уключиц ше до тройного сотруднїцства,  дзе треба вибрац ещи єдну трецу сушедну жем хтора полноправни член ЕУ (окрем  Словацкей) и ясно дефиновац  и добре виплановац заєднїцки проєктни предклади на хтори зме ше годни уключиц як копартнере (актуални теми у Европи Дунайска стратеґия и  обласц образованя «Програм 7» як  и змоцньованє капацитетох и людских ресурсох медзи националнима меншинами ).

 

У роботних схадзкох перши дзень учасц вжали Славко Рац, предсидатель Националного совиту, мр Среґей Тамаш, директор ЗКВР, др Янко Рмаач, Одсек за русинистику Филозофского факултету, Йоаким Грубеня, член Вивершного одбору Союзу Руснацох українцох РС и член Одбору за службове хаснованє язика и писма при Националному совиту, Мелания Римар, предсидателька Одбору за образованє, Иван Сабадош, предсидатель Одбору за информованє при Националному совиту.

 

4. фебруар

 

1-RK-01У рамикох роботней нащиви делеґациї Пряшовского самоуправного краю АП Войводини, други дзень госци зоз Словацкей нащивели Руски Керестур, а пред тим були у Бачким Петровцу ( нащива Оштини, Ґимназиї «Ян Колар» та Здруженя петровацких женох ).

 

У Руским Керестуре делеґация зоз Словацкей и їх домашню, подпредсидательку Скупштини Войводини Ану Томанову Маканову, нащивели Основну и штредню школу з домом школярох „Петро Кузмяк”, дзе их привитала членїца Националного совиту Руснацох (НС) и о.д. директора Школи Хелена Пашо Павлович зоз сотруднїками, а потим Дом култури и Руски народни театер „Петро Ризнич Дядя”.

 

Попри спомнутей Пашо Павловичовей, у Руским Керестуре им домашнї були предсидатель НС Руснацох и покраїнски посланїк Славко Рац, подпредсидатель НС Микола Шанта, предсидатель Вивершного одбору НС Желько Ковач, директор Дому култури Яким Рац и директорка РНТ Ивана Дудаш, а з госцами у Керестуре були и директор Заводу за културу войводянских Руснацох Серґей Тамаш и член Одбору за службене хаснованє язика и писма НС Яким Грубеня.

 

Хелена Пашо Павлович госцох поблїжей упознала з керестурску Школу, наглашуюци же є и єдина ґимназия по руски нє лєм у Сербиї, алє и швеце, а познєйше бешедоване и о дзепоєдних можлївосцох за сотруднїцтво у образованю. Госци поопатрали ушорени интернат и дзепоєдни учальнї, а у єдальнї Школи домашнї им пририхтали стародавни руски єдла – капущанїки, белюши, поаґачики, кашу.

 

У Доме култури делеґацию з ПСК и АП Войводини з рускима народнима шпиванками насампредз привитала Мишана шпивацка ґрупа, под руковительством Юлияна Рамача Чаму, а потим директор Яким Рац представел установу як єдну з трох професийних у обласци култури, як и нашо найвекши манифестациї и фестивали. О РНТ „Петро Ризнич Дядя”, алє и Туристичним здруженю Руски Керестур, хторому є тиж на чолє, бешедовала Ивана Дудаш.

 

У розгваркох заключене же Спорозуменє о сотруднїцтве того року будзе витворене насампредз у обласци култури, прейґ нащивох пряшовского ансамблу ПУЛС и Театру Александра Духновича, одредзених фаховцох у обласци култури, културного туризму,  алє и у образованю, прейґ черанкох нащивох штредньошколцох и студентох ( през лєто заплановане / юл и август орґанизованє Лєтнєй школи у природи у Татрох дзе нашо школяре поволани вжац учасц) . Надалєй плановане витворйованє и заєднїцких програмох у рамикох Дунайскей стратеґиї и других проєктох з хторима ше будзе конкуровац за средства з ЕУ.